චතුර්වේදි පැංචා

මම කොටුවේ ඉස්ටේසම ඉස්සරහා උන්නා බස් එකක් එනකල්. එතකොට ඇහුනේ නැතෑ කිෂෝර් කුමාර්ගේ ඒ කාලේ හුරු පුරුදු සිංදුවක් කොලු පැංචෙක්ගෙ හඬින්. කොහෙන්ද හඬ ආවේ කියල බලද්දි මිනිස්සු රංචුවක්ම ටී වී එකක් ඉස්සරහ හරියට කිරිකොට් මැච් එකක් බලනව වගේ බලනවා. ලං කරලා බැලින්නම් මේ සිංදුව කියන්නේ ඉංදියාවේ කොලු පැංචෙක් නෙව. මගේ අප්පේ සිරියාව මූනේ තියෙන. දෙනෝදාහක් ඉස්සරහා සිංදු කියනවා ලොකු මිනිහෙක් වගේ. මමත් ඉතිං බස් එකත් පහු වෙනකල් බලං හිටියා කොලු පැංචගෙ හපංකං. අනේ වාසනාවං. පස්සේ තමයි දැක්කෙ මුලු කොටුව පිටකොටුව පුරාම ඒ පැංචාගෙයි තව ඒ වගේම දස්ස පැංචො පැංචියංගේ සිංදු හැමතැනම දාල තියෙන බව. බස් කාරයොත් බස් නවත්තාගෙන බලනවා. කොංදොස්තරලාට ටිකට් කඩන්න අමතක වෙනවා. සීඩීත් හරි හරියට විකිනෙනවා. මමත් එකක් ගත්තා ඉතිං අපේ මුනුබුරාගේ කොම්පියුටරයට දාල බලන්න.